रोज गुलकंद घेवर हा राजस्थानचा एक प्रसिद्ध आणि शाही गोड पदार्थ आहे. सण-उत्सवाच्या किंवा विशेष मेजवानीच्या वेळी हा पदार्थ बनवून तुम्ही सर्वांना सरप्राईज देऊ शकता. घरात उपलब्ध असणाऱ्या मोजक्या साहित्यात अगदी १० ते १५ मिनिटांत मलाईदार गुलकंद घेवर कसा बनवायचा, त्याची सोपी आणि झटपट रेसिपी आज आपण पाहणार आहोत.
साहित्य-
1. घेवरच्या बेससाठी (झटपट पद्धत):
मैदा: १ कप
साजूक तूप: ३ ते ४ चमचे
थंड दूध: ½ कप
बर्फाचे खडे: ४ ते ५
रोज सिरप / रुह अफझा: २ चमचे (छान गुलाबी रंगासाठी)
थंड पाणी: गरजेनुसार
तळण्यासाठी: तेल किंवा तूप
रोज-गुलकंद रबडीसाठी:
दूध (फुल क्रीम): २ कप
गुलकंद: २ ते ३ चमचे
साखर: २ चमचे (आवडीनुसार)
वेलची पावडर: ½ चमचा
गुलाबी रंग / रोज सिरप: १ चमचा
सजवटीसाठी:
ड्रायफूट्स: बदाम, पिस्ता आणि काजूचे काप
वाळलेल्या गुलाबाच्या पाकळ्या
ALSO READ: सण-समारंभासाठी किंवा पाहुण्यांसाठी; गुलकंद पासून बनवा अतिशय सोप्या आणि शाही रेसिपीज
कृती-
पायरी १: रोज-गुलकंद रबडी तयार करा
एका पातेल्यात २ कप दूध मंद आचेवर उकळत ठेवा. दूध निम्मे होईपर्यंत आटवून घ्या. दूध घट्ट झाल्यावर त्यात साखर, वेलची पावडर आणि १ चमचा रोज सिरप घाला. गॅस बंद करून दूध थोडे थंड झाल्यावर त्यात २-३ चमचे गुलकंद मिक्स करा. आपली खमंग गुलकंद रबडी तयार आहे!
पायरी २: घेवरचे बॅटर (पिठ) बनवा
मिक्सरच्या भांड्यात ३-४ चमचे साजूक तूप आणि ४-५ बर्फाचे खडे घालून १ मिनिट फिरवून घ्या (तुपाचा मलाईसारखा पांढरा गोळा बनेल). आता त्यात थंड दूध आणि २ चमचे रोज सिरप घालून पुन्हा मिक्सर फिरवा. त्यानंतर त्यात मैदा आणि थोडे-थोडे अतिशय थंड पाणी घालत मिक्सरला १-२ वेळा फिरवून घ्या. (बॅटर एकदम पातळ आणि गुठळ्या नसलेले असावे).
पायरी ३: घेवर तळा
एका खोलगट लहान पातेल्यात किंवा कढईत अर्ध्यापेक्षा जास्त तूप किंवा तेल चांगले कडकडीत गरम करा. तेल कडकडीत गरम झाल्यावर तयार पातळ बॅटर चमच्याने किंवा बॉटलच्या मदतीने उंचावरून मध्यभागी थोडे-थोडे टाका. (तळताना बुडबुडे येतील, ते शांत झाल्यावर पुन्हा थोडे बॅटर टाका. ही प्रक्रिया ४-५ वेळा करा). मधोमध लाकडी काडीने किंवा सुरीने लहान छिद्र करा. घेवर कडेने सोनेरी व जाळीदार झाला की काडीच्या साहाय्याने हळूच बाहेर काढा आणि अतिरिक्त तेल निथळू द्या.
पायरी ४: घेवरची सजवट
तयार कुरकुरीत घेवर एका प्लेटमध्ये ठेवा. त्यावर तयार केलेली गुलकंद रबडी व्यवस्थित पसरवून लावा. वरून बारीक चिरलेले बदाम, पिस्ता आणि गुलाबाच्या वाळलेल्या पाकळ्या टाकून सजवा. चला तर शाही चवीचा, कुरकुरीत आणि मलाईदार ‘रोज गुलकंद घेवर’ तयार आहे!
खास टिप्स:
घेवर छान जाळीदार होण्यासाठी बॅटर अतिशय थंड आणि तेल कडकडीत गरम असणे खूप गरजेचे आहे. जर तुम्हाला जास्त गोड आवडत असेल, तर रबडी घालण्यापूर्वी घेवरवर १-२ चमचे साखरेचा पाक देखील टाकू शकता.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
ALSO READ: गुलकंद करंजी रेसिपी
Edited By- Dhanashri Naik
ALSO READ: Gulkand Kulfi recipe बाजारासारखी मलाईदार आणि सुगंधी गुलकंद कुल्फी आता घरीच बनवा