महाराष्ट्राच्या वैद्यकीय मदतीसाठी सेवा केंद्रांचे क्रमांक जाहीर

महाराष्ट्राच्या वैद्यकीय मदतीसाठी सेवा केंद्रांचे क्रमांक जाहीर

टोल फ्री क्रमांकासह पाच मोबाईल क्रमांक
बेळगाव : सीमाभागातील नागरिकांना वैद्यकीय सेवा मिळाव्यात यासाठी महाराष्ट्र सरकारकडून मुख्यमंत्री वैद्यकीय साहाय्यता निधीतून मदत उपलब्ध होऊ लागली आहे. मदत मिळत असली तरी यासाठी अर्ज कुठे व कसा करावा? याबाबत नागरिकांना माहिती नसल्याने टोल फ्री क्रमांक तसेच बेळगावमध्ये सेवा केंद्र सुरू करण्यात आले आहे. नागरिकांनी आपल्या परिसरातील सेवा केंद्रावर संपर्क साधून आरोग्य सेवांचा लाभ घ्यायचा आहे. महाराष्ट्रातील नागरिकांच्या आरोग्याच्या समस्यांसाठी वैद्यकीय साहाय्यता निधीतून मदत केली जात होती. महाराष्ट्रासोबतच सीमाभागातील 865 गावांमधील नागरिकांनाही या सुविधा उपलब्ध करून देण्यासाठी मागील वर्षभरापासून प्रयत्न सुरू होते. परंतु, आधारकार्ड तसेच इतर कागदपत्रे कर्नाटक सरकारची असल्याने तांत्रिक अडचणी येत होत्या. या अडचणी दूर करण्यात आल्या असून आता सीमाभागातील नागरिकांना वैद्यकीय सुविधा उपलब्ध होणार आहेत.
महाराष्ट्र सरकारने सीमावासियांसाठी टोल फ्री क्रमांक जाहीर केला आहे. 8650567567 या क्रमांकाशी संपर्क साधून अर्ज कसा करावा? तसेच इतर कागदपत्रांसाठी माहिती जाणून घेतली जाऊ शकते. अवयव प्रत्यारोपण, मेंदूचे आजार, हृदयरोग, डायलेसिस, नवजात शिशू आजार यासह इतर उपचारांच्या मदतीसाठी अर्ज करता येऊ शकतो. यासाठी उत्पन्नाचा दाखला, रेशनकार्ड, 865 गावातील रहिवासी असल्याचा दाखला, मध्यवर्ती म. ए. समितीचे शिफारसपत्र तसेच इतर कागदपत्रे आवश्यक आहेत. म. ए. समितीने नागरिकांच्या सोयीसाठी बेळगाव शहरात पाच ठिकाणी सेवा केंद्रे सुरू केली आहेत. विठ्ठलदेव गल्ली, शहापूर येथे प्रशांत भातकांडे सेवा केंद्र (मो. क्र. 9945548958), सिद्धीविनायक सेवा केंद्र, डाक बंगला, गोवावेस (मो. क्र. 9448866930), म. ए. सेवा समिती केंद्र, खडक गल्ली (मो. क्र. 9880131123), शिवाजी मंडोळकर सेवा केंद्र, शिवाजीनगर (मो. क्र. 9964070072), रंगुबाई भोसले पॅलेस सेवा केंद्र (9448145198) येथे संपर्क साधण्याचे आवाहन करण्यात आले आहे.