हिंदुत्वनिष्ठ कार्यकर्त्यांचा उचगाव येथे मेळावा

हिंदुत्वनिष्ठ कार्यकर्त्यांचा उचगाव येथे मेळावा

वार्ताहर /उचगाव
हिम्मत असेल तर सिद्धरामय्यानी कायदे मागे घेऊन दाखवावे, भाजप त्याला चोख उत्तर दिल्याशिवाय राहणार नाही. आम्हालाही पहावयाचे आहे. केलेले कायदे कसे मोडतात ते, असे परखड विचार कर्नाटकचे माजी उपमुख्यमंत्री के. एच. ईश्वरप्पा यांनी उचगाव येथील मेळाव्यात व्यक्त केले. येथील मळेकरणी देवीच्या आमराईमध्ये हिंदुत्वनिष्ठ कार्यकर्त्यांच्या 27 व्या भव्य मेळाव्याचे आयोजन केले होते. या मेळाव्याप्रसंगी ईश्वरप्पा बोलत होते. अध्यक्षस्थानी धनंजय जाधव होते. ईश्वरप्पा बोलताना पुढे म्हणाले ‘लाठी गोली खायेंगे मंदिर वही बनायेंगे’ ही म्हण बदलली असून, आता ‘मंदिर बनाया है ’ आता पुढे बोला काय करणार? आम्हा हिंदूंचे हम दो हमारे दो, पण तुम्ही ज्यांना साथ देता ते म्हणतात ‘हम पाच हमारे 25’ हे बंद करा. देशात रामराज्य आणा, गोहत्या बंद करायला भाग पाडा, हिंदुरक्षणाचे कायदे करा. असे विचार त्यांनी यावेळी व्यक्त केले. मेळाव्याचे उद्घाटन के. एच. ईश्वरप्पा यांनी केले. संजय कुबल यांनी प्रास्ताविक केले. यावेळी माहंतेश कवटगीमठ म्हणाले, अयोध्येमध्ये राम मंदिर निर्माण झाले आहे. गुंडू पाटील यांनीही विचार मांडले. अध्यक्षपदावरून बोलताना धनंजय जाधव म्हणाले, शिवाजी महाराज घडले त्यांच्या मागे जिजाऊ माता होत्या. आम्ही येणाऱ्या सर्व पिढीला इतिहास, संस्कृती शिकवली पाहिजेत. आपण जागरूक राहून राज्याच्या, देशाच्या विकासासाठी प्रयत्न करूया असे विचार त्यांनी मांडले. व्यासपीठावर हरिप्रसाद कोणो, गुंडू पाटील, मल्लिकार्जुन मज्जानावर, बसाप्पा चिकणीमठ, प्रमोद कोचेरी, रवी कोकितकर, संजय कुबल, धनश्री सरदेसाई, महापौर शोभा सोमणाचे, उपमाहापौर रेश्मा पाटील, बाळासाहेब देसाईसह मान्यवर उपस्थित होते.