लिव्ह-इन पार्टनरच्या अडीच वर्षांच्या मुलीवर अत्याचार करून हत्या; DMK पदाधिकाऱ्याचा नराधमपणा, पोक्सो अंतर्गत अटक
तामिळनाडू: तामिळनाडूच्या कृष्णगिरी जिल्ह्यातून एक अत्यंत संतापजनक आणि माणुसकीला लाजवणारी घटना समोर आली आहे. सत्ताधारी DMK पक्षाच्या युवा विंगमधील एका पदाधिकाऱ्याने अडीच वर्षांच्या चिमुकलीवर लैंगिक अत्याचार करून तिची निर्घृण हत्या केली आहे. या घटनेमुळे संपूर्ण राज्यात संतापाची लाट उसळली असून लहान मुलांच्या सुरक्षेचा प्रश्न पुन्हा एकदा ऐरणीवर आला आहे.
नेमकं प्रकरण काय?
मिळालेल्या माहितीनुसार, आरोपी हा त्याच्या लिव्ह-इन पार्टनरच्या अडीच वर्षांच्या मुलीसोबत राहत होता. डिसेंबर महिन्यात या चिमुकलीची प्रकृती अचानक बिघडल्याने तिला रुग्णालयात दाखल करण्यात आले होते, मात्र डॉक्टरांनी तिला मृत घोषित केले. सुरुवातीला हा नैसर्गिक मृत्यू वाटत असला, तरी मुलीच्या खऱ्या वडिलांना तिच्या मृत्यूबाबत संशय आला. त्यांनी तातडीने पोलिसांकडे धाव घेतली, ज्यानंतर तपासाची चक्रे फिरली.
तपासातून सत्य बाहेर
मुलीचा मृतदेह शवविच्छेदनासाठी पाठवण्यात आला होता. पोस्टमार्टम रिपोर्टमध्ये मुलीच्या शरीरावर अंतर्गत जखमांच्या खुणा आढळल्या, ज्यामुळे तिच्यावर लैंगिक अत्याचार झाल्याचे स्पष्ट झाले. पोलिसांनी जेव्हा संशयित पदाधिकाऱ्याला खाक्या दाखवला, तेव्हा त्याने आपला गुन्हा कबूल केला.
कारवाई: पोलिसांनी नराधम आरोपीवर पोक्सो (POCSO) कायदा आणि हत्येचा गुन्हा दाखल करून त्याला बेड्या ठोकल्या आहेत. पोलीस आता फॉरेन्सिक रिपोर्टची वाट पाहत असून आरोपीला कठोर शिक्षा व्हावी यासाठी पुरावे गोळा करत आहेत.
राजकारण तापले
सत्ताधारी पक्षाचा पदाधिकारीच या अमानुष कृत्यात सामील असल्याने तामिळनाडूतील राजकीय वातावरण चांगलेच तापले आहे.
विरोधकांचा हल्लाबोल: ‘तमिळगा वेत्री कझगम’ (TVK) सह इतर विरोधी पक्षांनी सरकारवर जोरदार टीका केली आहे. राज्यात महिला आणि मुले सुरक्षित नसल्याचा आरोप त्यांनी केला आहे.
सरकारची बाजू: दुसरीकडे, DMK सरकारने या प्रकरणावर स्पष्टीकरण देताना म्हटले आहे की, कायदा आपले काम करेल आणि दोषीला कोणत्याही परिस्थितीत सोडले जाणार नाही.
नात्याला आणि माणुसकीला काळिमा फासणाऱ्या या घटनेने जनमानसात प्रचंड रोष आहे.