मालमत्ता अपडेट करण्यात बेळगाव जि. पं. राज्यात आघाडीवर

मालमत्ता अपडेट करण्यात बेळगाव जि. पं. राज्यात आघाडीवर

बेळगाव : राज्य सरकारकडून ग्रा. पं. च्या व्याप्तीत येणाऱ्या मालमत्तांचे सर्वेक्षण करून ऑनलाईन नोंदणी करण्यात आली आहे. याबरोबरच मालमत्ता करवाढीचा निर्णय घेण्यात आला आहे. त्यामुळे ऑनलाईन नोंदणी झालेल्या मालमत्तांचे अपडेट करण्याची सूचना जि. पं. ला करण्यात आली आहे. त्यानुसार या प्रक्रियेमध्ये बेळगाव जिल्हा पंचायतकडून 42.62 टक्के काम पूर्ण करून राज्यामध्ये आघाडीवर आहे. यानंतर दुसऱ्या क्रमांकावर हासन 38.09 टक्के, तिसऱ्या क्रमांकावर दावणगेरे 33.53 टक्के, चौथ्या क्रमांकावर मंगळूर 32.91 टक्के आहे. महसूल वाढीच्यादृष्टीने राज्य सरकारने मालमत्तांची ऑनलाईन नोंदणी करण्याबरोबरच त्यामध्ये सुधारणा करण्यासाठी सूचना केली आहे. नवीन ऑनलाईन प्रणालीनुसार कर आकारणी सुलभ व्हावी याकरिता पंचतंत्र सॉफ्टवेअर उपलब्ध करून देण्यात आले आहे. मालमत्तेच्या आकारानुसार कर आकारणी करण्यास हे सॉफ्टवेअर अधिक सोयीचे ठरणार आहे. यासाठी नोंदणी झालेल्या मालमत्तांचे अपडेट करण्याची सूचना करण्यात आली आहे.
नवीन सॉफ्टवेअरनुसार मालमत्ता कर आकारणीमध्ये अधिक पारदर्शकता येण्यास मदत मिळणार आहे, असे जिल्हा पंचायत अधिकाऱ्यांकडून सांगण्यात येत आहे. जिल्हा पंचायत अधिकाऱ्यांनी दिलेल्या माहितीनुसार सरकारने नवीन सॉफ्टवेअरनुसार अपडेट करण्यासाठी सूचना केली आहे. त्यानुसार मालमत्तांचे अपडेट करण्यात येत आहे. या प्रक्रियेमध्ये राज्यामध्ये बेळगाव जिल्हा पहिल्या क्रमांकावर आहे. जिल्ह्यामध्ये 11 लाख 345 मालमत्ता आहेत. त्यापैकी 4 लाख 69 हजार मालमत्ता नवीन सॉफ्टवेअर प्रणालीमध्ये अपडेट करण्यात आल्या आहेत. दुसऱ्या क्रमांकावर हासन जिल्हा असून 5 लाख 67 हजार 253 मालमत्ता असून त्यापैकी 2 लाख 16 हजार मालमत्ता अपडेट करण्यात आल्या आहेत. दावणगेरे तिसऱ्या क्रमांकावर असून 3 लाख 51 हजार मालमत्ता असून 1 लाख 17 हजार 711 मालमत्ता अपडेट करण्यात आल्या आहेत. राज्य सरकारकडून नुकताच नवीन कर आकारणी प्रणाली सुरू केली आहे. कर आकारणीमध्ये पारदर्शकता आणण्यासाठी नवनवीन तंत्रज्ञान अवलंबविण्यात येत आहेत. करवाढीसाठी मार्गसूची जारी केली आहे. त्यानुसारच आता कर आकारणी होणार आहे. त्यामध्ये अपडेट करण्याची प्रक्रिया जलद गतीने राबविण्यासाठी सूचना करण्यात आली असल्याचे जि. पं. अधिकाऱ्यांकडून सांगण्यात येत आहे.