प्रीतिस्मिता भोईला सुवर्णपदक

प्रीतिस्मिता भोईला सुवर्णपदक

वृत्तसंस्था /लिमा (पेरु)
आंतरराष्ट्रीय वेटलिफ्टिंग फेडरेशनच्या येथे सुरु असलेल्या विश्व युवा वेटलिफ्टिंग चॅम्पियनशिप स्पर्धेत भारताची महिला वेटलिफ्टर प्रीतिस्मिता भोईने महिलांच्या 40 किलो वजन गटात क्लिन आणि जर्क प्रकारात नव्या विश्वविक्रमासह सुवर्णपदक पटकाविले. महिलांच्या 40 किलो वजन गटात भारताच्या 15 वर्षीय भोईने क्लिन आणि जर्कमध्ये 76 किलो वजन उचलत यापूर्वीचा नोंदविला गेलेला 75 किलोचा विश्वविक्रम मागे टाकत सुवर्णपदक पटकाविले. भोईने स्नॅचमध्ये 57 किलो असे एकूण 133 किलो वजन उचलले आहे. या स्पर्धेच्या पहिल्या दिवशी भोईने या विश्वविक्रम केला आहे. या वजन गटात भारताच्या ज्योत्स्ना सबरने एकूण 125 किलो वजन उचलत रौप्यपदक तर तुर्कीच्या फातीमा कोलाकने 120 किलो वजन उचलत कांस्यपदक मिळविले. स्पर्धेचा पहिला दिवस भारतीय स्पर्धकांना यशस्वी ठरला. पहिल्या दिवशी भारताच्या पायलने महिलांच्या 45 किलो वजन गटात एकूण 147 किलो वजन उचलत रौप्यपदक पटकाविले. या वजन गटात कोलंबियाच्या लॉरेनने 151 किलो वजन उचलत सुवर्णपदक मिळविले. पुरुषांच्या 49 किलो वजन गटात भारताचा बाबुलाल हेमब्रोमने एकूण 193 किलो वजन उचलत कांस्यपदक घेतले. स्पर्धेच्या पहिल्या दिवशी भारताने एकूण 4 पदकांची कमाई केली.