गजानन महाराज प्रगट दिन भक्तीभावाने साजरा

गजानन महाराज प्रगट दिन भक्तीभावाने साजरा

सामुदायिक पारायण, प्रवचन, पालखी सोहळा साजरा : महाप्रसादाचा हजारो नागरिकांनी घेतला लाभ
बेळगाव : शांतीनगर, मंडोळी रोड येथील श्री गजानन महाराज भक्त परिवार केंद्रातर्फे 146 वा प्रगट दिन उत्सव मोठ्या भक्तीभावाने साजरा करण्यात आला. यानिमित्त शनिवारी पहाटे 6 वाजता काकडारती, दुग्धाभिषेक, श्री गजानन विजयग्रंथ अध्याय 1 ते 17 चे सामुदायिक पारायण, दुपारी 1 वाजता श्रींची आरती व सायंकाळी 5 वाजता पालखी सोहळा झाला. रविवार दि. 3 मार्च रोजी प्रगट दिनाच्या मुख्य उत्सवादिवशी पहाटे 6 वाजता काकडारती, दुग्धाभिषेक, गजानन विजयग्रंथ 18 ते 21 चे सामुदायिक पारायण व प्रा. विजया धोपेश्वरकर यांचे प्रवचन झाले. दुपारी 12 वाजता श्रींची महाआरती झाल्यानंतर 12.30 ते 3 महाप्रसाद झाला. सायंकाळी 6 वा. दैनंदिन उपासनेनंतर 7 वा. आरती झाली. 10 वा. श्रींच्या शेजारतीने उत्सवाची सांगता झाली. दुपारी आयोजित महाप्रसादाचा हजारो नागरिकांनी लाभ घेतला. उत्सवाच्या यशस्वीतेसाठी मंदिर पदाधिकाऱ्यांनी विशेष परिश्रम घेतले.