नंदगड भागात चार दिवसात दोनवेळा शेतवडी तुडुंब

नंदगड भागात चार दिवसात दोनवेळा शेतवडी तुडुंब

अतिपावसामुळे शेतीला तळ्याचे स्वरुप
वार्ताहर /नंदगड
नंदगड, बेकवाड, हलशी परिसात गेल्या चार दिवसात दोनवेळा मोठा पाऊस झाला. त्यामुळे शेतवडीत व सर्वत्र पाणीच पाणी झाले. पाण्यामुळे शेतीला तळ्याचे स्वरुप प्राप्त झाले आहे. यावर्षी जून महिना सुरू होताच मंगळवार दि. 4 रोजी सकाळी या भागात मोठा पाऊस झाला. पावसामुळे शेतवडीत पाणी साचले होते. याच दिवशी पुन्हा दुपारनंतर प्रखर ऊन पडले. त्यामुळे दुसऱ्या दिवशी बुधवारी शेतवडीतील पाणी आटले होते. भाताच्या उगवणीसाठी व उगवलेल्या भाताला वाढीसाठी पाऊस पोषक ठरला होता. याच भागात गुरुवारी दुपारी तब्बल दोन तास मुसळधार पाऊस पडला. त्यामुळे पुन्हा शेतवडीत पाणी साचले आहे. पावसामुळे गटारीत साचलेली घाण व कचरा वाहून गेला आहे. सलग दोन दिवस पडलेल्या पावसामुळे शेतकऱ्यांत समाधानाचे वातावरण पसरले आहे.