खानापुरात ज्येष्ठ नागरिक संघटनेच्या बैठकीत विविध विषयांवर चर्चा

खानापुरात ज्येष्ठ नागरिक संघटनेच्या बैठकीत विविध विषयांवर चर्चा

विभागवार शाखा निर्माण करणार : सहल, आरोग्य शिबिराबाबत चर्चा
वार्ताहर /नंदगड
खानापूर तालुका ज्येष्ठ नागरिक संघटनेची बैठक नुकतीच खानापूर शहरातील चिरमुरकर गल्लीतील ज्ञानेश्वर मंदिरात पार पडली. या बैठकीत विविध विषयांवर चर्चा करण्यात आली. अध्यक्षस्थानी संघटनेचे अध्यक्ष व्ही. एम. बनोशी होते. प्रारंभी संघटनेचे सचिव सी. एस. पवार यांनी उपस्थितांचे स्वागत करून बैठकीचा उद्देश सांगितला. विविध मान्यवरांच्या हस्ते दीपप्रज्वलन व सरस्वती पूजन करण्यात आले. संघटनेचे एल. डी. पाटील यांनी मासिक अहवाल आणि मागील ठराव वाचून दाखवले. संघटनेचा विस्तार वाढल्यामुळे अभिवृद्धीसाठी खानापूर शहर, गर्लगुंजी, पारिश्वाड, लोंढा,जांबोटी विभागवार संघटनेच्या शाखा निर्माण कराव्यात व सेवा कार्यकारी संघटन गठीत करणेस सर्वांनी आवाजी मतदानाने प्रस्ताव पारित केला. वरिष्ठ पदाधिकाऱ्यांच्या सूचनेनुसार शाखांचे नियोजन करण्याचे ठरले. प्रमुख अतिथी थॉमस डिसोजा यांनी संघटनेबाबत सहकार्य करण्याचे आश्वासन दिले.
संघटनेचे अध्यक्ष व्ही. एम. बनोशी यांनी त्रैमासिक नियोजनाबद्दल ठळक मुद्दे मांडले. सहल तसेच आरोग्य शिबिराचे आयोजन करणे, संघटनेचे सभाभवन व आश्रम आणि संपर्क कार्यालय निर्माण करणे, गरजू व गरजवंतांसाठी सेवा देणे याबाबत विचार व्यक्त केले. बैठकीचे संयोजन एम. जी. बेनकट्टी व खजिनदार जिगजिनी यांनी केले. व्यासपीठावर संघटनेचे उपाध्यक्ष डी. एम. भोसले, पांडुरंग डिचोलकर, रमाकांत पाटील, जी. एल. हेब्बाळकर, एलेन बोर्जीस, सी. सी. घाडी, व्ही. एन. पाटील आदी उपस्थित होते. योगगुरू कुलकर्णी यांनी योगाबाबत माहिती, प्राणायाम व योगासने यांचे प्रात्यक्षिक सर्वांकरिता घेतले. उमाकांत वाघधरे यांनी  आभार मानले.