Crime News : डोक्यावरील केस चमकले अन् त्याचा डाव फसला
संतोष शिंदे
पिंपरी : शेजारी राहणार्‍या तरुणाने दारूच्या नशेत झोपलेल्या सुरक्षारक्षकाचा लोखंडी रॉडने वार करून खून केला. त्यानंतर लगेचच अंघोळ करून कपडे बदलले; तसेच पोलिसांना सुगावा लागू नये, यासाठी रक्त लागलेले कपडे उसाच्या शेतात टाकून दिले. गुन्ह्यात वापरलेला लोखंडी रॉडही लपवून ठेवला. घटनास्थळी पोहोचलेल्या पोलिसांसमोर तरुणाने आपल्याला काहीच माहिती नसल्याचा आव आणला. दरम्यान, एका चाणाक्ष पोलिस अधिकार्‍याची नजर त्याच्या केसांकडे गेली. नुकतेच तेल लावल्याने त्याचे केस चमकत होते.
संशय बळावल्याने दोरीवर टाकलेल्या अंडरवेअरला अधिकार्‍याने हात लावला असता अंडर वेअरदेखील ओली होती. त्यावरून पोलिसांनी चौकशी सुरू केली. तरुणाला अवेळी अंघोळ करण्याचे कारण काय? अंघोळीच्या आधी घातलेले शर्ट-पॅन्ट कुठे आहेत, असे पोलिसांनी विचारले. सुरुवातीला उडवाउडवीची उत्तरे देणारा तरुण काही मिनिटांतच पोलिसांचा ‘खाक्या’ पाहून घडाघडा बोलू लागला. केवळ चमकणार्‍या केसांमुळे उलगडा झालेल्या या गुन्ह्याची आजही सर्वत्र चर्चा आहे.
मराठवाड्यातील बीड येथून हातावर पोट असलेले एक कुटुंब उदरनिर्वाहासाठी हिंजवडी येथे आले होते. मुलाबाळांची गैरसोय नको म्हणून त्यांनी मुलांना शिक्षणासाठी नातेवाइकांकडे ठेवले होते. हिंजवडीत आल्यानंतर त्यांनी एका चाळीत खोली घेतली. घरातील कर्ता पुरुष असलेल्या पतीला दारूचे व्यसन होते. त्यामुळे त्याला कामावर कोणी घेत नव्हते. शेवटी एका बांधकाम साईटवर सुरक्षारक्षक म्हणून काम मिळाले. पत्नीनेही धुणी- भांड्याची कामे सुरू केली. चाळीत या कुटुंबासह आणखी एक कुटुंब वास्तव्यास होते. सर्वांचीच आर्थिक परिस्थिती जेमतेम होती.
या चाळीतील दुसरे दाम्पत्य त्यांच्या दोन मुलांसह काही वर्षांपासून या चाळीत वास्तव्यास होते. या कुटुंबातील मोठा मुलगा उच्चशिक्षित होता. तो खासगी नोकरीला होता. तर, 21 वर्षीय लहान मुलगा मजुरी करीत होता. या दोन्ही कुटुंबांमध्ये पाण्यावरून सतत भांडण व्हायचे. त्यातून मद्यपी सुरक्षारक्षकाने दमबाजी केली. त्यामुळे मजुरी करणार्‍या 21 वर्षीय तरुणाला राग आला. शेवटी सुरक्षारक्षकाचा काटा काढायचा, असे त्याने ठरवले.
दरम्यान, सुरक्षारक्षक नेहमीप्रमाणे दारूच्या नशेत येऊन घरात झोपला. त्याची पत्नी नेहमीप्रमाणे घरकामासाठी गेली. त्या वेळी घरी एकटाच असलेल्या शेजारच्या तरुणाने डाव साधला. लोखंडी रॉडने सुरक्षारक्षकावर वार करून त्याचा खून केला. दरम्यान, सुरक्षारक्षकाची पत्नी सायंकाळी कामावरून घरी आली. त्या वेळी सुरक्षारक्षकाचा खून झाल्याचा प्रकार उघडकीस आला. चाळीच्या मालकाने हिंजवडी पोलिस ठाण्यात फोन करून माहिती दिली.
हिंजवडी पोलिसांनी घटनास्थळी धाव घेतली. तपासाची चक्रे फिरवत खुनाचे कारण, आरोपी शोधण्याचा प्रयत्न सुरू केला. परिसरात कोठेच सीसीटीव्ही कॅमेरे नव्हते. तसेच, कोणीही तेथे आल्याचे दिसून येत नव्हते. चाळीतील प्रत्येक खोलीत जाऊन पोलिस कसून शोध घेत होते. त्या वेळी पोलिस उपनिरीक्षक महेंद्र गाढवे यांची नजर आरोपी तरुणाच्या केसांकडे गेली. केस तेल लावून पद्धतशीर विंचरलेले दिसून आले. शेजारी खुनासारखी घटना घडली असताना हा तरुण एवढा टापटीप कसा, असा प्रश्न गाढवे यांच्या मनात आला. आणखी केलेल्या पाहणीत त्यांना एक ओला साबण दिसून आला.
दोरीवर एक अंडरवेअर ओली असल्याचे दिसून आले. सायंकाळी इतक्या उशिरापर्यंत अंडवियर ओली कशी, असा प्रश्न गाढवे यांच्या मनात आला. त्यांनी अंडरवेअर आणि साबण ताब्यात घेतला. खून करून अंगावरील रक्ताचे डाग मिटवण्यासाठी तरुणाने नुकतीच अंघोळ केली असावी, असा संशय त्यांना आला. खात्री करण्यासाठी त्यांनी ही अंडरवियर कोणाची आहे, असे आरोपी तरुणाच्या वडिलांना विचारले. त्यावर माझ्या मुलाची ही अंडरवियर आहे, असे तरुणाच्या वडिलांनी सांगितले. त्यानंतर पोलिसांनी आरोपी तरुणाला ताब्यात घेत त्याच्यावर प्रश्नांची सरबत्ती केली. तरुणाने सुरुवातीला पोलिसांची दिशाभूल करण्याचा प्रयत्न केला. मात्र, पोलिसी खाक्यासमोर तो जास्त काळ टिकू शकला नाही.
घटनास्थळी गेल्यानंतर काहीही धागा सापडत नव्हता. परिसरातील सीसीटीव्ही तपासले त्यामध्येही काही मिळत नव्हते. शेजार्‍यांकडे चौकशी केली. मात्र, त्यांनाही काहीही माहिती नव्हते. दरम्यान, आरोपीच्या तेलामुळे चमकणार्‍या केसांवर नजर गेली. आणखी पाहणी केली असता मोरीत साबणातून पाणी टपकत असल्याने संशय बळावला. त्यामुळे बाजूला दोरीवर टाकली अंडरवेअर तपासली. अंडरवेअर ओली असल्याने आरोपीला सायंकाळी अंघोळ करण्याचे कारण विचारले. समाधानकारक उत्तरे न मिळाल्याने संशय बळावला. शेवटी आरोपीने गुन्हा कबूल केला.
– महेंद्र गाढवे, उपनिरीक्षक, पिंपरी-चिंचवड.
हेही वाचा
रशियात १४ मुलीचा वर्गात अंदाधूंद गोळीबार, विद्यार्थी ठार, पाच गंभीर
Crime News : वाघेश्वर मंदिरातील प्राचीन घंटा चोरीस
Pimpri News : विकासकामे पाहून ‘सीईओ’ भारावले
The post Crime News : डोक्यावरील केस चमकले अन् त्याचा डाव फसला appeared first on पुढारी.
पिंपरी : शेजारी राहणार्‍या तरुणाने दारूच्या नशेत झोपलेल्या सुरक्षारक्षकाचा लोखंडी रॉडने वार करून खून केला. त्यानंतर लगेचच अंघोळ करून कपडे बदलले; तसेच पोलिसांना सुगावा लागू नये, यासाठी रक्त लागलेले कपडे उसाच्या शेतात टाकून दिले. गुन्ह्यात वापरलेला लोखंडी रॉडही लपवून ठेवला. घटनास्थळी पोहोचलेल्या पोलिसांसमोर तरुणाने आपल्याला काहीच माहिती नसल्याचा आव आणला. दरम्यान, एका चाणाक्ष पोलिस अधिकार्‍याची …
The post Crime News : डोक्यावरील केस चमकले अन् त्याचा डाव फसला appeared first on पुढारी.
