13 मीटर लांब नखांचा विक्रम अबाधितच!
न्यूयॉर्क : अमेरिकेची डायना आर्मस्ट्राँग ही सर्वाधिक नखे वाढवणारी पहिली महिला ठरली असून, तिचा हा विक्रम नजीकच्या कालावधीतही अबाधितच राहील, असे संकेत आहेत. तिच्या सर्व 10 बोटांच्या नखांची लांबी दुहेरी बसच्या 42 फूट 10 इंच इतकी आहे.
या अमेरिकन महिलेने चक्क 25 वर्षे नखे कापली नाहीत. यासह तिने आपल्या नखांनी जगातील सर्वात अनोखा विक्रम रचला. या विक्रमासाठी तिचे नाव गिनीज बुक ऑफ वर्ल्ड रेकॉर्ड मध्येही नोंदवले गेले आहे. या महिलेचे म्हणणे आहे की, नखांमुळे तिला समस्यांना सामोरे जावे लागले; परंतु तिला आता याची सवय झाली आहे.
63 वर्षीय डायनाने सांगितले की, 25 वर्षे नखे न कापण्याचे कारण म्हणजे तिची मुलगी लथिसा हिचा मृत्यू 1997 मध्ये दम्याने झाला होता. लथिसा दर महिन्याला मॅनिक्युअर करून घ्यायची. तिला नखांची खूप आवड होती. डायनाने तिच्या मृत्यूच्या एक दिवस आधी लथिसाची नखे स्वच्छ केली होती आणि दुसर्‍या दिवशी तिची तब्येत अचानक बिघडली व तिचा झोपेतच मृत्यू झाला. त्यानंतर तिने म्हणूनच आजपर्यंत नखे कापली नाहीत. मात्र, यासाठी त्यांना अनेक त्याग करावे लागले. या नखामुळे तिला गाडी चालवता येत नाही. डायनाची नखे 2022 मध्येच जमिनीला स्पर्श करू लागली. डायना या नखांना वेगवेगळ्या रंगांनी रंगवते. नखे न कापण्याचा निर्णय घेऊन आपल्या मुलीला श्रद्धांजली वाहिल्याचे डायनाने म्हटले आहे.
