परळी वैजनाथ, Bharat Live News Media वृत्तसेवा : तलावातील बुडीत क्षेत्रातील गाळ व माती काढून शेतात टाकण्यासाठी २८ हजारांची लाच घेतना माजलगाव पाटबंधारे विभागाच्या परळी येथील कार्यकारी अभियंत्याला रंगेहाथ पकडण्यात आले. राजेश आनंदराव सलगरकर असे कार्यकारी अभियंत्याचे नाव आहे. ही कारवाई बीड लाचलुचपत प्रतिबंधक विभागाने आज (दि.२२) केली.
याबाबत अधिक माहिती अशी की, तक्रारदार व साक्षीदार आणि गावातील त्यांचे 5 सहकारी शेतकरी यांनी चिंचोटी तलावातील बुडीत क्षेत्रातील गाळ व माती काढून शेतात टाकण्यासाठी माजलगाव पाटबंधारे विभागाच्या कार्यालयात परवानगी मिळण्यासाठी अर्ज केला होता. सलगरकर यांनी तक्रारदार व साक्षीदार यांना गाळ व माती काढण्याची परवानगी देण्यासाठी प्रत्येकी ५ हजार प्रमाणे ७ शेतकऱ्यांकडे ३५ हजारांची मागणी केली होती. तडजोडीअंती २८ हजार रुपये देण्याचे ठरले. त्यावरुन आज माजलगाव पाटबंधारे विभागाच्या परळी वैजनाथ येथील कार्यालयात एसीबीने सापळा रचला. सलगरकर यांनी पंचा समक्ष लाच रक्कम २८ हजार स्वीकारताच लाच रकमेसह त्यास रंगेहाथ पकडण्यात आले. त्याच्याविरुद्ध परळी वैजनाथ शहर पोलीस ठाण्यात गुन्हा दाखल करण्याची प्रक्रिया सुरु आहे.
ही कारवाई छत्रपती संभाजीनगर लाचलुचपतचे पोलीस अधीक्षक संदीप आटोळे, अपर पोलिस अधीक्षक मुकुंद आघाव यांच्या मार्गदर्शनाखाली सापळा अधिकारी पोलीस निरीक्षक युनूस शेख, पर्यवेक्षण अधिकारी शंकर शिंदे, पोलीस निरीक्षक गुलाब बाचेवड, सुरेश सांगळे, श्रीराम गिरम ,अविनाश गवळी, भरत गारदे, अमोल खरसाडे, अंबादास पुरी, स्नेहल कुमार कोरडे,
गणेश म्हेत्रे यांच्या पथकाने केली.
हेही वाचा
बीड : केज येथे पाण्याच्या हौदात बुडून आचाऱ्याचा मृत्यू
बीड : परळीत उष्माघाताचा पहिला बळी, भाजीपाला विक्रेत्याचा मृत्यू
बीड : बालकाच्या मृत्यूमुळे डॉक्टरांना मारहाण; दोघांना अटक
