‘शक्ती’वर पर्यटकांचा अतिरिक्त ताण

‘शक्ती’वर पर्यटकांचा अतिरिक्त ताण

महिलांचा मोफत प्रवास : सार्वजनिक बससेवा विस्कळीत : बसवाहक, बसचालकांसह बसेसचीही कमतरता
बेळगाव : ‘शक्ती’ योजनेंतर्गत महिलांना मोफत बसप्रवास दिला जात आहे. त्यामुळे विविध धार्मिक आणि पर्यटनस्थळांवर पर्यटकांची संख्या झपाट्याने वाढली आहे. राज्यात सर्वत्र महिलांना मोफत प्रवास दिला जात आहे. त्यामुळे विविध धार्मिक आणि पर्यटन स्थळांना भेटी देणाऱ्यांची संख्या दुपटीने वाढली आहे. सध्या शैक्षणिक सहलींचाही हंगाम सुरू आहे. त्यामुळे धार्मिक आणि पर्यटनस्थळे फुल्ल होऊ लागली आहेत. 11 जूनपासून राज्यात शक्ती योजनेंतर्गत महिलांचा मोफत प्रवास सुरू झाला आहे. तेव्हापासून महिला प्रवाशांच्या संख्येत वाढ झाली आहे. सुरुवातीला पावसाळा दरम्यान वर्षा पर्यटनासाठीदेखील प्रवाशांची संख्या वाढली होती. पुन्हा आता डिसेंबर, जानेवारी दरम्यान पर्यटन हंगामासाठी प्रवाशांची संख्या वाढली आहे. मोफत प्रवास मिळत असल्याने महिला विविध धार्मिक आणि पर्यटनस्थळांना भेटी देऊ लागल्या आहेत. विशेषत: शनिवारी आणि रविवारी किंवा शासकीय सुटीदिवशी पर्यटनस्थळे बहरू लागली आहेत.
तब्बल 3.95 कोटी पर्यटकांची भेट
जिल्ह्यातील विविध पर्यटनस्थळांना 2023 मध्ये तब्बल 3.95 कोटी पर्यटकांनी भेट दिली आहे. यंदा 2024 मध्ये ही संख्या 5 कोटींच्या पुढे जाईल, असा अंदाज वर्तविला जात आहे. राजहंसगड, भुतरामहट्टी प्राणी संग्रहालय, सौंदत्ती यल्लम्मा, गोकाक फॉल्स, गोडचिनमलकी, भीमगड अभयारण्य, सोगल सोमनाथ, चिंचली मायाक्का आदी ठिकाणी भक्त आणि पर्यटकांचा ओघ वाढला आहे. राजहंसगड आणि भुतरामहट्टी प्राणी संग्रहालयाचा विकास साधण्यात आला आहे. त्यामुळे दैनंदिन भेटी देणाऱ्यांच्या संख्येत भर पडली आहे. या पर्यटनस्थळांना भेटी देण्यासाठी विशेषत: परिवहनच्या बसने प्रवास केला जात आहे. त्यामुळे सार्वजनिक बस सेवेवरही पर्यटकांचा अतिरिक्त ताण वाढू लागला आहे.
परिवहनच्या ताफ्यात बसवाहक, बसचालक आणि बसेसची कमतरता आहे. त्यामुळे विविध मार्गांवर बसफेऱ्या कमी होऊ लागल्या आहेत. त्यातच पर्यटनासाठी बाहेर पडणाऱ्या प्रवाशांची संख्या वाढली आहे. त्यामुळे सार्वजनिक बस वाहतूक विस्कळीत होऊ लागली आहे. धार्मिकस्थळांना व पर्यटनाला बाहेर जाणाऱ्यांचा ताण बससेवेवर वाढला आहे. शक्ती योजनेमुळे महिला परिवहनच्या बसला अधिक पसंती देऊ लागल्या आहेत. त्यामुळे पर्यटनासाठी फिरणाऱ्या महिलांचा अतिरिक्त ताण बससेवेवर वाढू लागला आहे. मायाक्का चिंचली आणि सौंदत्ती यल्लम्मा यात्रेसाठी जाणाऱ्या महिला प्रवाशांची संख्या अधिक आहे. त्यामुळे अतिरिक्त महिलांचा ताण बससेवेवर वाढू लागला आहे. डिसेंबर आणि जानेवारी शैक्षणिक सहलींचा हंगाम म्हणून ओळखला जातो. त्यामुळे शाळांच्या सहलीसाठी देखील बसेस धावू लागल्या आहेत. त्यामुळे इतर प्रवाशांना बसेसची कमतरता जाणवू लागली आहे. बेळगावला केवळ भाजी घ्यायची असली तरी महिला बसने प्रवास करू लागल्या आहेत. त्यामुळे बसेसवर अतिरिक्त ताण वाढू लागला आहे. त्यामुळे इतर प्रवाशांना बससाठी नाहक त्रास सहन करावा लागत आहे. विशेषत: विद्यार्थ्यांची यामध्ये फरफट होऊ लागली आहे.
बाहेर पडणाऱ्यांची संख्या अधिक
डिसेंबर, जानेवारी हा शैक्षणिक सहलींचा आणि पर्यटनाचा हंगाम म्हणून ओळखला जातो. या कालावधीत पर्यटनासाठी बाहेर पडणाऱ्यांची संख्या अधिक असते. त्यामुळे बससेवेवर पर्यटकांचा अधिक भार पडू लागला आहे. विशेषत: महिला बसने प्रवास करू लागल्या आहेत.
-ए. वाय. शिरगुप्पीकर (डेपो मॅनेजर)